Língua Kabuverdianu papiadu pa primeru bez na Asenbleia-Jeral di Nasons Unidu

Primêr Ministru José Maria Neves discursá na língua kabuverdianu, sóbd (24) na 66º Asenbleia-Jeral di Nasons Unidu. Fui primere bez na stória ki nós língua fui faladu na maior assembleia di paísis na mundu.

Neves flá ma édisidi komunika na Kriolu Kabuverdianu pamodi el é língua, é kultura, é stória y é memória i ki tudu língua é spreson di pensamentu, di tudu kusa ki nu sabe y di tudu kusa ki nu ta fase e ki língua é, suguramenti, spreson di un sivilizason.

"Asi, óki N ta uza Kriolu di Kabuverdi, na más inportanti tribuna di enkontru di Xéfis di Stadu y di Govérnu, N ta fase-l ku konvikison ma Kriolidadi é un valor antropolójiku di tudu Umanidadi y N ta fase-l inda pa distaka na el nos Kabuverdianidadi, nos alma, nos manera di ser, nos ethos y nos pathoskabuverdianu, un Kabuverdianidadi ki é razultadu di kruzamentu di txeu povu na mundu, y ki oxi ta konfigura na un síntizi y na un enkontru di sivilizasons", djustifika.

Chefi di Guvernu flá ma é dicidi fala na língua kabuverdianu pa presta di kel tribuna un vibranti omenaji a Aristides Pereira, purmeru Prezidenti di Kabuverdi e grandi kombatenti pa liberdadi y pa diginidadi di Umanidadi, ki dexanu na terra, pa brilha na seu di tudu mundu.

Lê tudu kel diskursu:

É pa mi un grandi ónra partisipa na Asenbleia-Jeral di Nasons Unidu y un grandi priviléjiu pode saúda nhos tudu, na nómi di Povu y di Govérnu di Kabuverdi. N sa ta diriji pa nhos na língua kabuverdianu, na Kriolu di Kabuverdi.

N ta pensa ma é purmeru bês ki, na Asenbleia di Nasons Unidu, sa ta komunikadu na Kriolu di Kabuverdi, y N sa ta fase-l pa partilha ku nhos es jenuínu patrimóniu di Umanidadi, ki nase na prinsípiu di séklu XV, y ki di akordu ku alguns linguísta y storiador, el é kriolu más antigu, di formason euro-afrikanu, na kontestu atlántiku.

N disidi komunika na Kriolu Kabuverdianu pamodi el é língua, é kultura, é stória y é memória. Tudu língua é spreson di pensamentu, di tudu kusa ki nu sabe y di tudu kusa ki nu ta fase. Língua é, suguramenti, spreson di un sivilizason.

Asi, óki N ta uza Kriolu di Kabuverdi, na más inportanti tribuna di enkontru di Xéfis di Stadu y di Govérnu, N ta fase-l ku konvikison ma Kriolidadi é un valor antropolójiku di tudu Umanidadi y N ta fase-l inda pa distaka na el nos Kabuverdianidadi, nos alma, nos manera di ser, nos ethos y nos pathoskabuverdianu, un Kabuverdianidadi ki é razultadu di kruzamentu di txeu povu na mundu, y ki oxi ta konfigura na un síntizi y na un enkontru di sivilizasons.

N ta faze-l inda pa N presta dês tribuna un vibranti omenaji a Aristides Pereira, purmeru Prezidenti di Kabuverdi e grandi kombatenti pa liberdadi y pa diginidadi di Umanidadi, ki kaba di dexanu na terra, pa brilha na seu di tudu mundu.

Papel di Mediason

Téma sentral di es asenbleia-jeral - papel di mediason na soluson di disputas pa meius pasífiku – é krusial y inperiozu pa mundu, y e ta konfigura na identidadi y na fórma di ser y di vive di Kabuverdianus. Komu sobriskritoris di prinsípius y fundamentus di Nasons Unidu, nu ta akridita na Pás y na Direitus Umanu komu elementus fundamental na konstruson di sobeanias, di stadu di direitu demokrátiku y di dizenvolvimentu sustentável.

Pur isu, di mediadoris ta speradu posturas y abordájens ku matrís universal na Pás y na Direitus Umanu, dôs prioridadi fundmental di tudu y pa tudu menbru di Nasons Unidu. Pa alén di kel-li, nu ta konsidera krusial abordájens ralasionadu ku prevenson y ku kontrolu di duénsas nãu-transmisível na tudu mundu, spesialmenti na vertenti di dizafius ki paízis en dizenvolvimentu ta enfrenta.

Un palavra spesial pa inportánsia di témas sima dizertifikason, digradason di sólu y séka na kontestu di dizenvolvimentu sustentável y di eradikason di pobréza ki ta figura na kuadru di preparason di Konferénsia di ONU sobri Dizenvolvimentu Sustentável (RIO+20), ajendadu pa Junhu di 2012, ki nu ta apoia vivamenti y ativamenti.

Un di kes ason markanti di Kabuverdi indipendenti, lógu dipôs di anu 1975, foi presizamentiraflorestason, djuntu ku koreson orográfiku y mobilizason di agu.

Un Stadu Insular Pikikinóti en dizenvolvimentu, na kruzamentu di dôs spasu grandi – Sahel y Makaronézia, ku ifetus rigorozu di aleatoriedadi klimátiku, pa un ladu, y di izolamentu oseániku, pa otu ladu, Kabuverdi ten konsiénsia di inportánsia di ekonomia verdi y di ekonomia azul a favor di Dizenvolvimentu Sustentável.

Nu meste ONU pa djuda-nu na realiza nos kuóta-parti na prevenson di mudansas klimátiku, na garanti suguransa alimentar y na konbate penúria di agu. Nu ta konta ku ONU y ku tudu paízis di es inportanti Asenbleia-jeral, tantu bilateral komu multilateral, pa nu alinha na direson di un ekonomia verdi y di Dizenvolvimentu Sustentável.

Pur isu, dja nu tene en kursu un ouzadu prugrama ki ta ben kubri teritóriu nasional ku 50% en enerjias renovável, na orizonti di 2020. Apezar di mudansas puzitivu y siginifikativu, alguns di es ku raperkuson internasional, sima graduason di Kabuverdi a país di Rendimentu Médiu, N ta gostaba simé di mostra li un poku mas di nha país.

Kabuverdi

Kabuverdi é formadu pa 10 ilha na Atlántiku Médiu, el sta stratejikamenti na koredor y na flúkusu inter-atlántiku, kusa ki ta bira-l un fórti parseru pa geo-stratéjia di suguransa global y pa komérsiu mundial, komu inda un ativu y útil menbru di komunidadi internasional na luta kóntra tráfikus y konportamentus disvianti, ligadu ku kriminalidadi.

Kabuverdi ten un vastu área oseániku ki ta konstitui un spasu di suguransu na promoson di pás y prosperidadi rejional y, inda, na afirmason di un djunta-mon internasional kóntra ilísitus di grandi skala. Ki país é kel-li?

Alguns ta purgunta. Nason di Amílcar Cabral, alguns ta ta rusponde. País di Cesária Évora, otus ta tenta adivinha.

Kabuverdi, un téra ki dja foi un inportanti entreposto y bazi di transhipment di skravus afrikanu, tantu pa Európa komu pa Amérikas y oxi ta projeta si sidadi más antigu – Rubera Grandi, konxedu pa Cidade Velha – na Patrimóniu Mundial di Umanidadi, rakonhisidu pa UNESCO na 2009.

Un Stadu ki ta izorta tudu kes otu pa konsebe, en konformidadi ku Stória, ku Memória y di Direitus Umanu, Róta Internasional di Skravus, komu un Holocausto, un pontu altu di barbaridadi umanu.

En Kabuverdi, nos povu ta dizâfia si parserus luzófonu di CPLP y parserus afrikanu y di mundu interu, pa reafirma ses engajamentu kóntra asons di barbaridadi, kóntra ditadura, kolonialismu y disruspetu pa Direitus Umanu, através di promoson di kandidatura di Kanpu di Konsentrason di Tarafal, na Ilha di Santiagu, a Patrimóniu di Umanidadi.

Ken ki konxe-nu sabe ma nos é un país dizejozu di dizenvolvimentu. Nu ka ta kontenta sô ku ser un País di Rendimentu Médiu, mas nu meste parseria di komunidadi internasional pa nu pode kunpri nos distinu.

Dja nu identifika sinku pilaris na nos Ajénda di Transformason di Kabuverdi, y ki ta bâzia na Stratéjia di Kressimentu y di raduson di pobréza, nomeadamenti: promoson di un governason ku efikásia; raforsu di dizenvolvimentu umanu; aseitason di dizafius struturais y sosiais di konpetitividadi; invistimentu na infra-struturas; melhoria y koezãu sosial.

Kabuverdi sa ta dizenvolve un pulítika stérnu en prol di demokrasia, di justisa, di pás, di koperason y di dizenvolvimentu sustentável. Nu ta odja pa planéta komu un kaza di nos tudu, nu ta ruspeta soberanias y vontadis di povu y nu ta difende konverjénsia global sobri fundamentus di Umanidadi. Asi, nu ta preokupa ku fómi na Corno di Áfrika.

Igualmenti, nu ka ta sosega enkuantu milharis di kriansas ta móre, tudu dia, di fómi na Áfrika. É preokupanti ki es situason ka ta dizenkâdia un intervenson internasional más firmi, dja ki ditadura di fómi é di kes piór ditadura ki ten.

Nu ta izorta Nasons Unidu pa fase un sforsu más efetivu y más diterminadu pa inverti kuadru tristi di es trajédia umanu na Áfrika Oriental. Pur isu, nu ten di eradika jeopolítika di fómi. Nos tudu, nu meste asumi, efetivamenti, paradigma di Fómi Zéru na mundu!

Ta preokupa-nu, inda, guéras y tensons ki dja prolifera pa tudu parti, y ki sta lokalizadu, oxi, ku txeu intensidadi, na Áfrika, na Médiu Orienti y na Ázia, pa kontentamentu di tafikantis di disgrasa y di kenha ki ta invisti na indústria di géra, pa sufrimentu di milhons di seris umanu, prinsipalmenti di kriansas, mudjeris y gentis di idadi.

Ta sérba bon nu txiga a un konsénsu global ma suguransa, pás y stabilidadi ta dipende di dizenvolvimentu ekonómiku y sosial di Stadus y di Povus. Nu ten ki diskonstrui géras, konflitus y tensons entri paízis y povus, nu ten ki ruspeta konpromisu di 66ª Asenbleia-Jeral pa es nóbri obijetivu. Nu ta reafirma ma mediason é fundamental pa razolve konflitus, tantu na Áfrika komu na Mundu interu.

Krizi ekonómiku

Krizi ekonómiku mundial é prementi. Na paízis grandi, el sa ta da sinal ma el krê instala. Y na paízis más póbri el sa ta asentua. Si krizi é global, el ta iziji raspóstas global kóntra pulítikas ki ka ta promove dizenvolvimentu y ki ka ta proteje merkadu doméstiku kóntra géra kanbial y inportason di présus disleal.

Meste ten pozisons global y konverjenti pa aumenta inkluzon sosial komu fórma di raduzi inpatus di krizi sobri ekonomia. Nu ta reitera nos puzison di ruspeta sénpri leis internasional, prinsípiu di nãu-injerénsia na asuntus intérnu y di soberania di povus y di nasons.

Nu ka ta subskreve padrons diferenti pa kazus idéntiku, móda si povus y nasons ka igual ô, anton, ka meresedoris di mesmu tratamentu, dianti di Karta di Nasons Unidu.

Antis di tirmina, N krê sublina nos puzison favorável pa inkrementu di mudelu di governason global pa parti di Nasons Unidu, u-ki ta pirmiti, entri várius ganhu, ki paízis emerjentis pasa ta ten maiór vós na prosésu di tomada di disizon di sistéma internasional.

Konselhu di Suguransa

Kabuverdi ta apoia, sen izitason, alargamentu di menbrus permanenti na Konselhu di Suguransa di ONU, unbês ki mundu dja ka é más kel di fin di Sugundu Géra Mundial, nen é ka ta parse ku kel di fin di Géra Fria.